Otto Feger (1905 - 1968)

 Dr Otto Feger isch scho vu sinere Biografii här brädeschtiniärt gsii fir dr Vrsuech, s alemannisch Eländ im ditsche Südweschte im e näie Ufbruch z beände. Ar isch 1905 z Milhüse im Elsiß uf d Wält kumme. Si Vater isch e Lokfiährer gsii, dr isch üs dr badische Ortenau gstammt. Si sin z Thann im Oberelsiß gwohnt; wu aber im 1. Weltgriäg d Franzose im Elsiß iimarschiärt sin, isch im Otto si Vater z Innerfrankrich interniärt wore. Dr Bue isch dmo uf e franzesisch Gymnasium kumme, speter uf e schwizerischs.

Noch em Griäg sin bekanntlig alli "Richsditsche" vu dr Siigermacht üs em Elsiß üsgwiise wore un do mueß aü im Feger si Vater, e Alemann üs dr Ortenau, drzue zellt haa. Wahrschiins in däm Zämmehang isch si Farmili uf Friiburg im Briisgaü umgsiidlet; dr Otto isch aü därte fir kurzi Zit uf d Schuel. Abgschlosse het er si Gymnasialbildig z Indiana in dr USA.

Z Amerika het er afange Jura stüdiäre, witergmacht het er z Friiburg in dr Schwiz un z Berlin. Dr het iber e velkerrächtligs Thema bromoviärt. Ab 1929 het er uf Arbetsämter z Stuegert (Stuttgart), z Heppenheim, z Singe un z Bad Mergentheim gschafft, isch aber scho 1933 frischtlos entlasse wore. In dr Nazi het si unabhängig politisch Denke nit gfalle, wu scho bi sinem Studium un bi sinere Dokterarbet sichtbar wore isch. No het er z Rhiinfälde e Tätigkeit as Wirtschafts- un Stiirsachverständige ufgnumme, het aber aü do wider Ärger mit dr Nazi bikumme.

1935 het er z Friiburg im Briisgaü afange Gschiicht stüdiäre un het im Umkreis vum Theodor Mayer bal afange produktiv wirke; si hischtorischi Dokterarbet ("Zur älteren Siedlungsgeschichte des hinteren Wiesentals") het er 1941 abgä. Schiins het er aü miäße Griägsdiänscht leischte, wenigschtens zitewiis, bsunders z Italiä.

Im Aügüscht 1945 het er d Leitig vum Stadtarchiv Konschtanz ibernumme un bis 1966, wu ner grank wore isch, biibhalte. No dr "Schwäbisch-Alemannische Demokratie" (1946) sin sini wichtigschte Publikatione gsii: "Geschichte des Bodenseeraumes" (dräi Bänd, ab 1956) un "Zur Geschichte des alemannischen Herzogtums" (1957, z finde in: Zur Geschichte der Alemannen, Hg. Wolfgang Hübner, Darmstadt 1975).

Dr Otto Feger het also, wiä mer siht, an allene Ecke un Ände vum Alemanneland gläbt un gwirkt, e lokalpatriotischi Bschränkig uf si Dorf oder si Gegned isch em fern gläge, dr het s alemannisch Ganzi im Aüg gha. So ebis isch e Sälteheit. Dr hätt s Ziig drzue gha, in jedere Hirarchii Karriäre z mache, isch aber wäge sinene alemannische Uffassige mit jedere Herrschaft iberzwärch gstande. Anderscht wiä viil anden Intellektuelli het er sich nit drzue verleite lo, si Volk im Stich z lo, Verrot an däne Lit z iäbe, wu ner abstammt vunene. Des un si Bewandertheit in dr Gschiichts-, Rächts- und Wirtschaftswisseschaft het e zume Vordänker vu dr Alemanne wäre lo.

Si Brogramm "Schwäbisch-Alemannische Demokratie" isch friili wenig realischtisch gsii, s het wenig Chance uf Verwirklichung gha. Iber dr Greis vum Schwäbisch-Alemannische Heimatbund nüs, wu im Aügüscht 1946 grindet wore isch, sin wennig bereit gsii, fir so ebis iizstoh. Dr Hischtoriker Karl S. Bader nännt s in sinem Dagebuechiitrag vum 2. 4. 46 "leicht verrückt", aber mit "teilweise hübschen Einfällen, Formulierungen und Anregungen". Diä Aregige hän fruchtbare Bode gfunde: Dr Paul-Ludwig Weinacht schribt, aß "nicht wenige süddeutsche Föderalisten" historischi Argumenter üs em Feger sinem Buech bezoge hän, dr nännt do bsunders dr Leo Wohleb un dr Wolfgang Hoffmann, beides Politiker vu dr BCSV (Badische Christlich-Soziale Volkspartei, des isch dr Vorläifer vu dr badische CDU).

Wänn also im Otto Feger si Brogramm aü kei diräkti Umsetzig erfahre het, so het si Ufruef doch ideologisch uf d Weichestellig vu dr Nochgriägsordnig iigwirkt. Ohni dr Otto Feger wäre d Weiche villicht no liädriger gstellt wore. Si Muet zur Utopii het sich glohnt, drotz aß er em niä dankt wore isch.

Dä groß Alemann, wu 1905 im Elsiß uf d Wält kumme isch, isch 1968 im badische Konschtanz, zwische Oberschwabe un dr Schwiz un in Sichtwiti vu Vorarlbärg vrstorbe.

Harald Noth

 Biografischi Date üs: Bernd Ottnard (Hg.): Badische Biographien. NF Bd. 1. Stuttgart 1982.